Numri i palestinezëve që vdesin në paraburgim izraelit është rritur në gati 100 persona që nga fillimi i luftës në Gaza, sipas një raporti të publikuar të hënën nga një grup i të drejtave të njeriut.
Ai pohon se dhuna sistematike dhe mohimi i kujdesit mjekësor në burgje dhe qendra paraburgimi kontribuan në shumë nga vdekjet që u shqyrtuan.
Pamja që del nga raporti i Mjekëve për të Drejtat e Njeriut -Izrael është në përputhje me gjetjet e Associated Press, e cila intervistoi më shumë se një duzinë njerëzish rreth abuzimeve në burgje, neglizhencës mjekësore dhe vdekjeve, analizoi të dhënat e disponueshme dhe shqyrtoi raportet e autopsive.
AP foli me një ish-roje dhe një ish-infermiere në një burg, një mjek izraelit që trajtonte të burgosur të kequshqyer të sjellë në spitalin e tij, ish-të paraburgosur dhe të afërmit e tyre, si dhe avokatë që i përfaqësonin ata dhe grupet e të drejtave.
Ish-roja në një burg ushtarak të njohur për trajtimin e ashpër të palestinezëve i tha AP-së se të burgosurit prangoseshin rregullisht me zinxhirë dhe goditeshin me shqelma e shkopinj, dhe se objekti ishte quajtur “varrezë” sepse shumë të burgosur po vdisnin atje.
Nga 98 vdekjet e të burgosurve të dokumentuara nga PHRI që nga 7 tetori 2023, 27 ndodhën në vitin 2023, 50 në vitin 2024 dhe 21 këtë vit, më e fundit më 2 nëntor, ka raportuar AP.
PHRI thotë se numri aktual i të vdekurve gjatë kësaj periudhe kohore është “me shumë mundësi dukshëm më i lartë”, duke vënë në dukje se Izraeli ka refuzuar të japë informacion në lidhje me qindra palestinezë të ndaluar gjatë luftës.
“Edhe pse po japim prova për një numër më të lartë vdekjesh sesa [është raportuar më parë], kjo nuk është një pamje e plotë”, tha ai. “Jemi të sigurt se ka ende njerëz që kanë vdekur në paraburgim për të cilët nuk dimë.”
