Bashkë u bënë këtë të shtunë.
Me qëllimin e vetëm, përurimin e rrugës ndërkufitare Gorozhup – Pogaj.
Fillimisht, u bë prerja simbolike e shiritit të kuq.
E më pas, ia zgjatën edhe dorën njëri tjetrit.
Kësisoj, Kosova e Shqipëria bënë përhajër rrugën më të re që synon të lidh më shumë njerëzit, tregtinë dhe kulturën.
Kryeministri në detyrë, Albin Kurti tha se kjo rrugë do të ndikojë jashtëzakonisht shumë në zhvillimin ekonomik.
“Të bëjmë inaugurimin e kësaj rruge tejet të rendesishme për banorët e kësaj zone por edhe për turizmin malor e kulturor të dy Republikave tona të të njëjtit komb, si një arterie vendimtare në qarkullimin e lirë për shkëmbimet të cilat do të jenë gjithnjë e më të mëdha. Ky është një pjesë e vogël e borxhit të madh ndaj këtij komuniteti që i ka dhënë shumë edhe zhvillimit ekonomik edhe historisë sonë kombëtare”, deklaroi Kurti.
Pjesë e kësaj ceremonie ishte edhe ambasadori i Shqipërisë në Kosovë, Petrit Malaj.
Ai theksoi se kjo rrugë jo vetëm që forcon lidhjen fizike, por edhe atë shtetërore të të dyja vendeve.
“Përveç asaj lidhje shpirtërore të traditës të historisë të kulturës mes veti sepse ne jemi një komb duhet që patjetër të lidhemi edhe fizikisht e kjo rrugë është një nga ato që përfundon një finale si të thuhet e tre rrugëve të para por do të vazhdojmë përsëri komunikimet e përbashkëta mes dy Qeverive që të lidhim akoma më shumë njerëzit tanë, pra që gjaku të rrjedh në damarët tanë ashtu siç duhet”, tha Malaj.
Disa fjalë i pati edhe kryetari i Bashkisë së Hasit, Miftar Dauti.
“Nuk është rrugë që ka bashku vetëm Gorozhupin me Pogaj, por ka bashku kombin shqiptar Kosovën me Shqipërinë, por më e veqanta që ka bashku Hasin me Hasin sepse Hasi padrejtësisht në ‘48 është ndarë nga fuqitë e mëdha. Kështu që kjo është një arterie që ndikon në zhvillimin ekonomik të dy zonave”, deklaroi Dauti.
Në anën tjetër, Burim Zabelaj, pronar i kompanisë që ka realizuar projektin, tha se punimet kanë përfunduar brenda afateve të parashikuara.
“Ne këtë projekt e kemi filluar vitin e kaluar, natyrisht nëse e marrim si plan dinamik nuk ka zgjat më shumë se tetë muaj duke pasur parasysh edhe periudhën e dimrit e cila nuk llogaritet në pjesën e planit dinamik, pasi që edhe me kontratë, edhe me Ligj të prokurorimit është e rregulluar kjo çështje”.
E banorët e kësaj zone shprehën mjaft të kënaqur me përfundimin e rrugës.
“Rruga shumë mirë po më duket, kom me shku te dajtë me vizitu se i kom anej. E kemi prit qe një 1 vit këtë rrugë”, u shpreh banori Xhafer Binaj.
“Kjo rrugë është shumë mirë, na kanë ndihmu shumë me këtë rrugë, sepse s’kemi pas rrugë hiç mu lidhë me kushërinjë e çka kemi anej”, tha banori Limon Tejeci.
Siç është bërë e ditur, kjo rrugë është e gjatë 3.7 km dhe kap vlerën prej 1 milion euro.
Kronikë e realizuar nga gazetarja, Jona Kelmendi.
