26 korriku është data e fundit për konstituim të Kuvendit të Republikës.
Por pavarësisht këtij obligimi nga Gjykata Kushtetuese, ligjvënësit po vazhdojnë të dështojnë që të konstituojnë këtë institucion.
E nëse kalohet kjo datë, deputetët kanë pasoja juridike.
Deputetja e Lëvizjes Vetëvendosje, Mimoza Kusari Lila thotë se mund të rrezikohet edhe humbja e mandateve.
“Jemi të vetëdijshëm që pasojat juridike mund të pasojnë pas kalimit të këtij afati, nuk ka ndodhur ende që në një legjislaturë të merret mandati i gjithë deputetëve të kuvendit, por janë 120 deputetë të legjislaturës së nëntë, të cilëve të gjithëve mund të ju merret mandati, për të ju përcjellë pastaj me deputetë tjerë që janë në listë të gjitha partive politike. Kjo mund të jete njëra prej pasojave të mundshme”, ka thënë Kusari Lila.
Të njëjtin mendim me Kusarin Lilën e ndanë edhe deputetja e Nismës, Xhevahire Izmaku.
“Unë nuk jam juriste por edhe ju e dini që pasojat juridike ka të bëjë edhe me mandatet, kështu që duhet me pasë parasysh secili nga ne që duhet thjesht me vepru”, ka thënë Izmaku.
E si shkak i këtij ngërçi, Instituti i Kosovës për Drejtësi thonë se po rrezikohet bllokimi i institucioneve të pavarura.
Hulumtuesi Naim Jakaj ka thënë se janë 17 institucione që aktualisht, po funksionojnë me mungesa të anëtarëve ose janë jofunksionale për shkak të mosveprimit të Kuvendit.
“1. Gjykata Kushtetuese – Dy gjyqtarë në Gjykatën Kushtetuese nuk janë përzgjedhur në fund të vitit 2024 nga Kuvendi. 2. Organi Shqyrtues i Prokurimit – Pozita e Kryetarit të Bordit është e zbrazët pas dorëheqjes më 12 gusht 2024. 3. Institucioni i Avokatit të Popullit – Katër zëvendësavokatëve të Popullit u ka përfunduar mandati më 14 qershor. 4.Këshilli i Pavarur Mbikëqyrës për Shërbimin Civil të Kosovës – Sipas Ligjit të ri, duhet të emërohen edhe 10 anëtarë të rinj. 5. Agjencia Kosovare e Pronës – Komisioni për Verifikim dhe Vendosje për Prona – Duhet të plotësohet me 2 anëtarë vendor. 6. Fondi i Kursimeve Pensionale të Kosovës – Dy pozita janë të paplotësuara: përfaqësuesi i punëtorëve dhe ai nga bizneset”, ka thënë Jakaj.
Ai ka përmendur edhe institucionet tjera që rrezikojnë të bllokohen.
Ndërkohë, nga 15 prilli, deputetët kanë dështuar të konstituojnë Kuvendin e Kosovës.
