Derisa po vazhdon votimi përmes postës për shtetasit e Kosovës që janë regjistruar si votues jashtë vendit, Komisioni Qendror i Zgjedhjeve ka njoftuar edhe një herë për adresat e kutive postare të vendosura në shtete të ndryshme të botës.
Këto adresa janë të domosdoshme në procesin e votimit përmes postës dhe sipas Zëdhënësit të KQZ-së, Valmir Elezi, votuesit duhet ta dërgojnë pakon e tyre me fletëvotim vetëm në adresë të ndonjërës nga kutitë postare.
“Të gjithë shtetasit e Kosovës për të cilët ka filuar procesi i votimit përmes postës, duhet të dërgojnë pakon e tyre me fletëvotim vetëm në adresë të ndonjërës nga kutitë postare”, ka thënë Elezi.
Komisioni Qendror i Zgjedhjeve ka njoftuar se janë hapur kutitë postare në 23 shtete të ndryshme, si: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mal i Zi, Maqedonia e Veriut, Norvegji, SHBA, Shqipëri, Slloveni, Suedi, Turqi, Mbretëria e Bashkuar dhe Zvicër.
Më 9 janar 2025, ka filluar periudha 31 ditore e votimit përmes postës për të gjithë shtetasit e Kosovës të cilët janë regjistruar për të votuar nga jashtë Kosovës dhe që kanë përzgjedhur këtë mënyrë votimi.
Kjo periudhë (9 janar – 8 shkurt 2025) do të vlejë vetëm për shtetasit që kanë arritur të regjistrohen suksesshëm si votues jashtë Kosovës dhe që gjatë regjistrimit janë përcaktuar individualisht për mënyrën e votimit:
- duke dërguar fletëvotimin përmes postës në një nga kutitë postare të hapura nga KQZ jashtë Kosovës, apo
- duke dërguar fletëvotimin përmes postës në kutinë postare të KQZ-së në Kosovë.
