Trepça do të jetë pa trajnerin Adis Beqirqgiq kundër Golden Eagle Yllit, ndeshje kjo që zhvillohet këtë vikend në Mitrovicë dhe i takon xhiros së 18-të në Superligën e Kosovës në basketboll.
Beqiragiq është suspenduar me një ndeshje nga Komisioni i Garave për shkak të sjelljeve josportive në duelin Trepça – Bashkimi.
Beqiragiq u përjashtua nga ndeshje në fund të çerekut të dytë pasi u ndëshkua për herë të dytë me gabim teknik duke u diskualifikuar shkaku i veprimeve të tij ndaj njërit prej gjyqtarëve.
Trepça e mposhti Bashkimin në derbin e javës së 17-të me shifrat 90:81 për t’u forcuar në krye të tabelës me 31 pikë, tri më shumë se skuadra nga Prizreni që zë vendin e dytë.
Gjithashtu, Beqiragiq ka marrë edhe një gjobë prej 600 eurosh kurse pa u gjobitur nuk ka shpëtuar as Trepça e as basketbollisti i saj, Sek Henry.
Trepça ka marrë gjobë prej 700 eurosh derisa Henry është gjobitur me 100 euro, ndërsa Elijah Clarence i Sigal Prishtinës dhe Amit Hot të Borës janë ndëshkuar me nga 50 euro secili.
