Kryetari i FFK-së Agim Ademi ka uruar opinionin futbolldashës, për fillimin e sezonit pranveror të Superligës, në vendin tonë.
Të nderuar dashamirë të futbollit, lojtarë, trajnerë, zyrtarë dhe tifozë të zjarrtë,
Me dy duelet e sotme të xhiros së 19-të të Superligës, ku do të takohen Ballkani – Dukagjini dhe Drita – Malisheva, fillon sezoni vendimtar për ekipet mëtuese për titull, për garat evropiane dhe mbetje në elitë.
Në vazhdim sjellim shkrimin e plotë të kryetarit të FFK-së:
Sot nis një tjetër kapitull emocionues i futbollit tonë, me fillimin e stinorit pranveror në Albi Mall Superligën e Kosovës. Ky është një moment i rëndësishëm për futbollin kosovar, pasi rikthehen emocionet e garës, ku klubet tona do të luftojnë me pasion dhe përkushtim për të arritur suksese.
Federata e Futbollit e Kosovës mbetet e përkushtuar për të avancuar më tej kampionatin tonë, duke ofruar kushte më të mira për klubet dhe lojtarët, për rrritjen e cilësisë së garës dhe zhvillimin e infrastrukturës.
Ne kemi punuar vazhdimisht për të siguruar një garë sa më të ndershme dhe profesionale, duke forcuar sistemin e ndarjes së drejtësisë dhe duke rritur standardet organizative në çdo aspekt.
Prandaj, ftoj të githë akterët e futbollit – klubet, trajnerët, lojtarët dhe tifozët – që të jenë pjesë e një stinori të mbushur me rivalitet, fair-play dhe emocione të forta. Duke pasur parasysh përgatitjet e skuadrave jashtë vendit dhe përkushtimin e drejtuesve të klubeve për t’u ofruar lojtarëve kushte optimale, jam i bindur se do të kemi një kampionat rivalizues, ku cilësia dhe spektakli do të jenë në qendër të vëmendjes.
