Mesfushori Amir Abrashi do të jetë pjesë e skuadrës së Grasshopperit edhe pas përfundimit të edicionit aktual.
Abrashi, të enjten e ka vazhduar edhe për një vit kontratën me Grasshopperin, ka njoftuar ekipi që bën gara në Superligën e Zvicrës.
Me rinovimin e kontratës që i skadonte këtë verë, Abrashi do të mbetet te Grasshopperi deri në verën e vitit të ardhshëm. 33-vjeçari është kapiten i Grasshopperit, ndërsa u rikthye te kjo skuadër në vitin 2021 pas periudhave te Baseli e Freiburgu. Abrashi ka luajtur për Grasshopperin pesë vjet, përpara se të largohej në vitin 2015 për ta vazhduar karrierën në Gjermani. Në total, ai ka mbi 200 paraqitje për Grasshopperin në të gjitha garat.
“Për mua nuk ka tjetër klub veç Grasshopperit. Kjo është shtëpia ime”, ka thënë Abrashi pasi ka rinovuar kontratën. Këtë edicion, Abrashi ka 2 asistime në 23 paraqitje në kampionat, ndërsa Grasshopperi zë vendin e 10-të në Superligë pas 25 xhirove të zhvilluara.
Abrashi ka edhe 50 ndeshje të luajtura me Kombëtaren e Shqipërisë.
