Kandidati për kryetar të komunës së Prizrenit, Artan Abrashi, në emisionin “Mesditë” në Tëvë1, ka folur për kryetarin aktual të komunës, Shaqir Totaj, duke e kritikuar për premtime të pambajtura gjatë mandatit të tij katërvjeçar.
Abrashi ka komentuar edhe deklaraten e Totajt për parkingjet ku ka thënë se nuk është realizuar për shkak të pengesave të qeverisë në detyrë, por theksoi se në mandatin e tij të ardhshëm ky problem do të zgjidhet.
“Shaqir Totaj shquhet si kryetar i cili nuk e ka përmbushur thuajse asnjë premtim gjatë këtij mandati 4-vjeçar. Është kryetari më i dobët në histori të komunës së Prizrenit dhe e konsideroj që është më i dobëti në krejt këtë garë në nivel Kosove”, tha Abrashi.
Ai shtoi se do të mbështesë këtë qëndrim me fakte dhe të dhëna konkrete:
“Sa i përket disa realizimeve të premtimeve të tij, duke u bazuar në GAP, premtimet që ai pretendon se i ka përmbushur janë vetëm 42% dhe janë të llojit që do t’i publikoj dokumentet ligjore përkatëse, vetëm sa për të manipuluar”, theksoi Abrashi.
Kandidati Abrashi u shpreh se realizimi i projekteve të papërmbushura, si parkingjet, do të jetë prioritet i tij në mandatin e ardhshëm.
