Shefi i Grupit Parlamentar të PDK-së, Abelard Tahiri, tha se me miratimin e Ligjit për Institutin e Krimeve të Kryera gjatë Luftës në Kosovë nga, siç e quajti ai, koalicioni Zdravo i udhëhequr nga Albin Kurti, po legalizohet kërkesa e kamotshme e Serbisë, raporton teve1.info
Përmes një statusi në Facebook, zgjatjen e afatit për hulumtimin e krimeve të luftës deri në dhjetor të 2000-ës nga Qeveria e Kosovës dhe shumica parlamentare, Tahiri e quajti veprim antihistorik, antikombëtar dhe të pafalshëm.
“Nuk mund ta kuptoj se çfarë borxhi kaq të madh ka Albin Kurti ndaj Serbisë, aq sa interpretimet e saj politike t’ia akomodojë në norma ligjore, siç ishte rasti i djeshëm me kohëzgjatjen e hulumtimit të krimeve të luftës deri me datën 31 dhjetor, 2000.
Kur lufta ka përfunduar në qershor të 1999-tës, kush paska bërë krime lufte deri në dhjetor të 2000-tës? Cilën zonë operative e paskan në target këto hulumtime? Dukagjinin? Drenicën? Llapin? Kush qenkan ata kryerës të krimeve të luftës në vitin 2000? Komandantët, ushtarët e UÇK-së, KFORI?
Miratimi i Ligjit për Institutin e Krimeve të Kryera gjatë Luftës në Kosovë nga koalicioni Zdravo i udhëhequr nga Albin Kurti, gjatë seancës së errët të ditës së djeshme, përmes së cilave pretendohet të hulumtohen krime lufte deri në dhjetor të 2000-tës, është një veprim antihistorik e antikombëtar dhe i pafalshëm, përmes së cilit legalizohet kërkesa e kamotshme e Serbisë”, ka shkruar Tahiri.
Ai e ka akuzuar Qeverinë dhe shumicën parlamentare se në bashkëpunim me Milan Radojiçiqin ua kanë mohuar veteranëve kompensimin nga paga minimale, duke i larguar nga ky ligj.
“Se këtu ka një koordinim për akomodimin dhe amnistinë e Serbisë për krimet e kryera në Kosovë, tash është mjaft e qartë dhe ky koordinim po jep frytet e para. Në këtë vijë, Albin Kurti dhe Milan Radojçiqi dje u kujdesën edhe për përuljen e padinjitetshme që Qeveria “Zdravo” ua bëri veteranëve të Ushtrisë Çlirimtare të Kosovës me largimin e tyre nga kompensimi paralel me pagën minimale.
Ku jeni nisur kështu? Kah po shkoni? Çfarë borxhi keni ndaj Serbisë?”, ka shkruar Tahiri
