Kryetari i Lidhjes Demokratike të Kosovës, Lumir Abdixhiku, ka bërë të ditur se një nga pikat kryesore ku nuk është arritur dakordim në bisedimet me kryetarin e Lëvizjes Vetëvendosje, Albin Kurti, ka qenë çështja e presidentit të vendit.
Pas takimit me Kurtin, Abdixhiku tha se LDK ka kërkuar që në një marrëveshje të mundshme politike t’i takojë e drejta për të propozuar kandidatin për president, mirëpo për këtë nuk është arritur pajtim.
“Është çështja e presidentit. LDK ka shpresuar që presidenti të propozohet nga LDK, pastaj emrat të diskutohen. Në këtë pikë nuk ka pasur dakordim”, tha Abdixhiku.
Kreu i LDK-së theksoi se oferta që, sipas tij, i ishte bërë partisë në dhjetor nuk është e pranueshme, duke vlerësuar se nuk siguron përfaqësim të dinjitetshëm për LDK-në në një qeverisje të mundshme.
“Oferta e dhjetorit që LDK të marrë vetëm, zv.km dhe ministri, s’është e mjaftueshme dhe s’është e dinjitetshme. S’mund ta trajtojmë e pranojmë. Nëse e doni LDK’në, atëherë LDK duhet të jetë e përfaqësuar. Kryeministri s’na takon, Kryetari i takon LVV’së me Kushtetutë, përfaqësimi i vetëm është një propozim, jo propozim bllanko, dhe presidenti bëhet i gjithë Kosovës”, ka deklaruar ai.
Sipas Abdixhikut, pikërisht mospajtimet rreth balancës institucionale dhe mënyrës së përfaqësimit në institucionet shtetërore vazhdojnë të mbeten pengesë për arritjen e një marrëveshjeje ndërmjet LDK-së dhe Lëvizjes Vetëvendosje.
