Abdixhiku në Facebook ka ftuar të gjithë shqiptarët që ta mbështesin Shaip Kamberin dhe Koalicionin e Shqiptarëve të Luginës.
Sipas tij, Kamberi është kandidati i vetëm që përfaqëson zërin e shqiptarëve në Luginë, e siç tha ai për këtë i duhet mbështetja e të gjithëve.
“Këtë të premte, më 27 maj, Shaip Kamberi dhe “Koalicioni i Shqiptarëve të Luginës” për herë të tretë kërkojnë mbështetjen e shqiptarëve në sigurimin e ulëses së vetme përfaqësimi. Si kandidat i vetëm me gjasë për të shtruar e përfaqësuar zërin e shqiptarëve në Luginë, atij i duhet e gjithë mbështetja e votuesve të Qendrës numër 6 në Tërnoc, për të kthyer prapa padrejtësinë e ripërsëritjes së votimit. Prandaj ftoj secilin votues shqiptar në këtë qendër të ripërsëritur, që masivisht, këtë të premte, t’u drejtohen kutive të votimit e të mbështesin Shaipin dhe Koalicionin e Shqiptarëve në Luginë”, ka shkruar ai.
Tutje ai tha se Kamberi ka qenë një zë i vetmuar por i guximshëm në mbrotjen e të drejtave të shqiptarëve në Luginë, e sipas tij çdo votë për të është votë për zërin shqiptar në Serbi.
“Shaipi është një patriot i madh. Ai ka qenë një zë i vetmuar por i guximshëm në mbrotjen e të drejtave të shqiptarëve në Luginë. Prandaj, çdo votë për të është votë për zërin shqiptar në Serbi”, ka shkruar ai.
