Kryetari i Lidhjes Demokratike të Kosovës (LDK), Lumir Abdixhiku, ka uruar Shtetet e Bashkuara të Amerikës me rastin e Ditës së Pavarësisë, që festohet më 4 korrik.
Përmes një postimi në faqen zyrtare të LDK-së në Facebook, Abdixhiku tha se 4 Korriku i vitit 1776 nuk është vetëm data e shpalljes së pavarësisë së SHBA-ve, por edhe simbol i luftës për liri, demokraci dhe të drejta universale për të gjithë popujt.
“SHBA-të janë shembulli më domethënës i angazhimit për një botë më të drejtë, më paqësore dhe më të sigurt. Për shumë shtete, përfshirë Republikën e Kosovës, SHBA-të janë model frymëzimi dhe mbështetjeje”, ka thënë Abdixhiku.
Ai ka theksuar se kontributi amerikan në lirinë, shtetformimin dhe forcimin e Kosovës është i jashtëzakonshëm dhe i pazëvendësueshëm, duke shtuar se miqësia me SHBA-të është një vizion politik i qartë që buron nga Presidenti Historik, Dr. Ibrahim Rugova.
“Kosova shtet i pavarur e sovran, i integruar në NATO dhe BE, dhe me miqësi të përhershme me Shtetet e Bashkuara të Amerikës”, citohet Rugova në postimin e Abdixhikut.
Në fund, Abdixhiku ka uruar popullin dhe qeverinë amerikane për festën kombëtare:
“Urime 4 Korriku!
Zoti i bekoftë Shtetet e Bashkuara të Amerikës!
Zoti e bekoftë miqësinë e përhershme ndërmjet Kosovës dhe SHBA-ve!”
