Kështu deklaroi kryeministri në detyrë i Republikës së Kosovës, Albin Kurti ditë më parë për mos konstituimin e Kuvendit, për çka po fajëson opozitën.
Me deklaratën e kryeministrit në detyrë, Albin Kurtit se opozita po e zgjatë mandatin e qeverisë në detyrë u pajtua të mërkurën edhe e propozuara për kryeparlamentare, Albulena Haxhiu, pas dështimit të seancës së 37-të për konstituim të kuvendit.
Ajo ka akuza edhe ndaj partive opozitare.
“Për 29-të herë ata kanë ardhë nuk kanë marrë fare pjesë në votim pra as nuk kanë votuar për, as kundër as nuk kanë abstenuar. Ne është e vërtetë që nuk kemi marrëveshje me opozitën por përveç se këta po e bllokojnë konstituimin e kuvendit, këta po e zgjasin edhe mandatin e qeverisë, për ditë flasin kundër qeverisë, në vazhdimësi thonë se qeveria Kurti ka qenë më e dëmshmja ndonjëherë, por në anën tjetër duket se nuk po i besojnë fjalëve të tyre”, ka thënë Haxhiu.
E kundërpërgjigje ka lideri i Lidhjes Demokratike të Kosovës, Lumir Abdixhiku.
“Mos dëgjoni deklarata që nuk kanë fije inteligjence, të ketë dinjitet edhe punën që e bëni. Mos i dëgjoni njerëzit që flasin pa fije inteligjence, që po ia zgjasim mandatin z.Kurtit, është jo legjitim pa mandat, e ka uzurpua detyrën e kryeministrit edhe të deputetit në të njëjtën kohë. Nuk ka logjikë një gjë e tillë, është urgjente të bëhen institucionet e Kosovës? , tha Abdixhiku.
Për deklaratën e Kurtit nuk foli, por Vlora Çitaku nga PDK, akuzat i drejton për bllokadën që sipas saj, e ka krijuar LVV në Kuvend.
“Kjo situatë është tërësisht e papranueshme mirëpo në këtë pikë të bllokadës së plotë, jemi si rezultat i kryeneçësisë, i papërgjegjësisë së Lëvizjes Vetëvendosje dhe Albin Kurtit. Madje, madje dëgjojmë edhe deklarime qesharake ku gjoja se i kanë numrat për qeveri, por nuk i paskan numrat për kryeparlamentarin kjo situatë nuk do koment”, u shpreh Çitaku.
Një zgjidhje për të dalë nga ky ngërç politik, po e kërkon sërish i pari i NISMA-së, Fatmir Limaj.
“Forcat politike në Kosovë, ngadalë ngadalë duhet me ik nga kalkulimet edhe lojëra fjalësh, por duhet të fokusohemi, të përqendrohen për mbushjen e asaj që presin qytetarët e Kosovës, atë që e pret shteti i Kosovës, sa më shpejtë edhe ashtu jemi duke u vonuar, tepër është vonuar”, tha Limaj.
Tentativa e radhës për konstituim të Kuvendit, mbahet të premten me fillim në ora 11:00.
