Kryetari i Lidhjes Demokratike të Kosovës (LDK), Lumir Abdixhiku, ka pritur në takim delegacionin e Grupit të Miqësisë Francë–Ballkani Perëndimor të Senatit francez, i shoqëruar nga ambasadori i Francës në Kosovë, Jean-François Huchet.
Në njoftim thuhet se, gjatë takimit u diskutua për marrëdhëniet ndërmjet Kosovës dhe Francës, si dhe për rëndësinë e thellimit të bashkëpunimit dhe forcimit të partneritetit ndërmjet dy vendeve.
Abdixhiku ka shprehur mirënjohjen për mbështetjen e vazhdueshme të Francës ndaj Kosovës, veçanërisht në proceset demokratike, zhvillimin institucional dhe avancimin e vendit drejt integrimit evropian.
Kryetari i LDK-së ka theksuar gjithashtu rëndësinë e vazhdimit të bashkëpunimit të ngushtë me Francën dhe të mbështetjes franceze për anëtarësimin e Kosovës në organizatat ndërkombëtare.
Sipas Abdixhikut, mbështetja e Francës mbetet e rëndësishme edhe për forcimin e pozitës së Kosovës në arenën ndërkombëtare./teve1.info/
