Kryetari i Lidhjes Demokratike të Kosovës, Lumir Abdixhiku, të martën ka pritur në takim përfaqësuesit e organizatorët e Lutjeve të Mëngjesit nga Shtetet e Bashkuara të Amerikës.
Përmes një postimi në Facebook, Abdixhiku ka thënë se Kosova sot edhe më shumë ka nevojë për dorën e miqësisë.
Ai ka shtuar se LDK-ja do të vazhdojë angazhimin për ruajtjen dhe thellimin e aleancës mes Kosovës dhe SHBA-ve.
“Rrugëtimi ynë politik nuk ka qenë i lehtë. Por në secilën kthesë të vështirë, kemi pasur praninë dhe mbështetjen e miqve tanë amerikanë – në lutje, në ndihmë, në vizion të përbashkët. Lutjet e Mëngjesit janë simbol i bashkimit shpirtëror dhe politik – vend ku dallimet tejkalohen për hir të paqes, mirëkuptimit dhe dashurisë për tjetrin. Në këtë frymë u ndërtua miqësia Kosovë–SHBA. Dhe në këtë frymë duhet ta ruajmë e ta thellojmë. LDK, si partia që e vendosi raportin tonë me Perëndimin në themel të identitetit shtetëror të Kosovës, do të vazhdojë të jetë ura e këtij bashkëpunimi të shenjtë. Do të jemi gjithnjë falënderues e gjithnjë të angazhuar për ta ruajtur këtë aleancë, si pasuri të popullit tonë”, ka shkruar Abdixhiku./teve1.info/
