Kandidati për kryeministër nga LDK-ja nuk ka dalë i kënaqur me rezultatet e zgjedhjeve.
Edhe përkundër këtij fakti, ai tha se është rezultat demokratik.
“Dritë do të ketë në Kosovë. Ky është rezultat demokratik. LDK-ja del me rritje të konsiderueshme nga ky proces, ndonëse rezultati nuk është i kënaqshëm krahasuar me përmasat që kemi pritur. Gjithsesi, për gjërat tjera do të mbajmë konferenca në vazhdim”, tha ai në konferencë për media.
Ndërkohë lidhur me rezultatet e KQZ-së, Abdixhiku tha se Prokuroria duhet të merret me rastin, nëse ka të bëjë me çështje të keqpërdorimit.
“Nuk mund të paragjykoj, besoj që Prokuroria është duke u marrë me këtë rast. Duhet të merren me këtë rast, sepse është çështje e keqpërdorimit të rezultatit final në një ambient që do duhej të ishte i qetë. Qytetarët le ta ruajnë qetësinë demokratike. Garat nuk bëhen për të mundur dikë, bëhen për të pasur alternativë. Rezultatet janë këto që janë, votimet janë të ruajtura prej komisionerëve e vëzhguesve, ku votat do të ruhen në mënyrë të sigurt”, tha ai./teve1.info/
