Me rastin e 25-vjetorit të Epopesë së Ushtrisë Çlirimtare të Kosovës, kryetari i Lidhjes Demokratike të Kosovës, Lumir Abdixhiku, tha se datat 5,6 dhe 7 mars, janë përpjekja finale e Kosovës për liri, shtet dhe pavarësi.
Abdixhiku kështu u shpreh gjatë homazheve në Kompleksin Memorial “Adem Jashari” në Prekaz, ku njëherit përmendi edhe rënien e komandantit, Adem Jashari dhe familjes së tij.
“Atëherë sot nderojmë 25-vjetorin e Epopesë së Ushtrisë Çlirimtare të Kosovës, nderojmë datat 5,6 dhe 7 mars të viti 1998. Në këtë tempull të sotëm kanë rënë heroikisht familja Jashari, komandanti legjendar Adem Jashari dhe në këtë rënie të tyre ka lindur është përpjekja finale e Kosovës për liri, për shtet dhe pavarësi. Mbi sakrificën e Adem Jashari, familjes Jashari dhe të gjithë të të rënëve tjerë të UÇK-së, qëndron edhe rrugëtimi ynë i ardhshëm për një shtet të barabartë mes vendeve evropiane”, deklaroi Abdixhiku.
Po ashtu, Abdixhiku tha se këto ditë duhet të kujtohen gjithnjë si përpjekje e pashtershme e popullit të Kosovës.
“Lavdi të gjithë të rënëve të Ushtrisë Çlirimtare të Kosovës”, e përmbylli Abdixhiku./teve1.info/.