Kryetari i Lidhjes Demokratike të Kosovës, Lumir Abdixhiku, ka reaguar sërish përmes rrjetit social Facebook, duke u përgjigjur ndaj kritikave dhe sulmeve që po i bëhen partisë që ai udhëheq.
Abdixhiku ka deklaruar se për punët e brendshme të LDK-së do të ketë rend dhe ka kërkuar mirëkuptim nga mbështetësit për mosreagimin ndaj çdo sulmi apo “helmi” që ata po përballen.
“Por LDK nuk bjen në detin e madh të parëndësisë së tyre; prandaj kërkojmë mirëkuptim nga mbështetësit tanë se pse nuk reagojmë për çdo helm që kanë. Për punët brenda shtëpisë sonë, do të ketë rend. Me kohë gjithçka,” ka shkruar Abdixhiku.
Ai gjithashtu ka theksuar se LDK-ja po përballet me kundërshtarë që aktivizohen për ngjarje periferike, por nuk kanë fjalë për sukseset e partisë.
“Jemi të vetëdijshëm që kemi kundërshtarë, të tillë që fërkojnë duart dhe aktivizohen edhe për ngjarje periferike të partisë, porse për sukseset nuk kanë asnjë fjalë,” ka shtuar ai.
Në fund, kryetari i LDK-së ka përmbyllur me një mesazh optimizmi dhe besimi për të ardhmen e partisë:
“Kemi punë shumë më të mençura tani. Jemi në garë; aty na duhet secili angazhim i njerëzve të mrekullueshëm tanë. Kemi nisur diçka të madhe. Po e shohim që ju kemi pas. Le të fitojmë tash! Për helmin e madh ndaj Lidhjes, ndërsa kundërshtarëve do t’u bjerë të presin gjatë. Lidhja është e fortë. Po rritet. Veç me besim e bindje; me anëtarësinë e popullin pas; dhe mbi të gjitha pa interesa e pa kalkulime. Kjo është pasuria më e madhe e jona,” ka shkruar ai.
