Kryetari i Lidhjes Demokratike të Kosovës, Lumir Abdixhiku, ka akuzuar Qeverinë e Kosovës se po ushtron bllokadë politike ndaj kryeqytetit, duke penguar ekzekutimin e buxhetit të Komunës së Prishtinës.
Në një reagim të publikuar në Facebook, Abdixhiku tha se pas bllokadës 10-mujore të shtetit, tashmë pushteti ka zhvendosur bllokimin në nivel lokal.
Sipas tij, ky veprim ka lënë Prishtinën pa transport publik, me punëtorë komunalë pa paga dhe me qytetarët të detyruar të presin në stacione, ndërsa shërbime të tjera esenciale rrezikojnë të ndërpriten.
“Jetojnë për bllokadë, punojnë për bllokadë, ushqehen me bllokadë,” ka shkruar Abdixhiku, duke e cilësuar këtë si “hakmarrje politike” ndaj qytetit dhe ndaj Komunës së Prishtinës.
Ai pretendon se Qeveria po pengon lirimin e 35 milionë eurove të buxhetit komunal, mjete që, sipas tij, janë të vetë Prishtinës dhe nuk kërkojnë votim në Kuvend në mënyrën si po argumentohet nga pushteti.
Abdixhiku shtoi se bllokimi i buxhetit po cenon funksionimin e shkollave, qendrave mjekësore dhe shërbimeve bazike për qytetarët.
Ai kritikoi qeverinë se po fshihet pas justifikimeve burokratike, duke pretenduar se problemi nuk lidhet me procedurat, por me “vullnetin politik”.
“Prishtina nuk i kërkon paratë e Qeverisë, prandaj nuk i duhet asnjë votim në Kuvend. Prishtina i kërkon paratë e veta; plot 35 milion euro taksa komunale e grant, që i janë plaçkitur nga bllokuesit për hakmarrje të pastër politike”, u shpreh kryetari i LDK-së.
Në reagimin e tij, ai e cilësoi situatën si “pengmarrje të kryeqytetit”, duke thënë se kjo është akti më i rëndë i Qeverisë së Albin Kurtit, e cila sipas tij ka humbur kontaktin me qytetin dhe me detyrimin për t’i shërbyer njerëzve”.
Abdixhiku përfundoi duke thënë se “Prishtina ka folur një herë dhe do të flasë sërish”./teve1.info./
