Kryetari i Lidhjes Demokratike të Kosovës, Lumir Abdixhiku, ka deklaruar se nominimi i ish-kryetarit të degës së Podujevës, Agim Veliu, përfaqëson vullnetin e anëtarësisë dhe një hap të rëndësishëm drejt bashkimit të partisë.
Përmes një postimi në Facebook, Abdixhiku ka falënderuar Degën e LDK-së në Podujevë për, siç është shprehur ai, unitetin, pjekurinë dhe përgjegjësinë e treguar në këtë periudhë që e ka cilësuar si moment të madh bashkimi për partinë.
Ai ka theksuar se LDK-ja ka ditur gjithmonë të forcohet përmes unitetit dhe bashkëpunimit të brendshëm, duke shtuar se ky është mesazhi më i rëndësishëm për qytetarët.
“Falënderoj Degën e Podujevës për unitetin, pjekurinë dhe përgjegjësinë e treguar në këtë moment të madh bashkimi për Lidhjen Demokratike të Kosovës. Nominimi nga dega i ish-kryetarit të saj, Agim Veliut, është dëgjim i vullnetit të anëtarësisë dhe një hap i mbarë në ndërtimin e bashkimit të madh për të cilin jemi angazhuar të gjithë. LDK-ja gjithmonë ka ditur të bëhet më e fortë atëherë kur ka ditur të bëhet bashkë. Dhe ky është mesazhi më i mirë që mund t’u japim sot qytetarëve tanë; se mbi çdo dallim, mbi çdo pakënaqësi e mbi çdo periudhë të kaluar, qëndron shtëpia jonë e përbashkët politike, Lidhja Demokratike; dhe përgjegjësia jonë ndaj Republikës”, ka shkruar ai.
Ndryshe, zëdhënësi i Lidhjes Demokratike të Kosovës, Besian Mustafa, ka njoftuar se Dega e LDK-së në Podujevë ka nominuar Agim Veliun si kandidat për deputet.
Veliu nuk ishte përfshirë në listën e LDK-së si kandidat për deputetë në dy palë zgjedhjet e mbajtura më 2025.
Më herët ishte kryetar i Podujevës, deputet dhe ministër i Punëve të Brendshme./teve1.info/
