Kandidati i Lidhjes Demokratike të Kosovës për kryeministër, Lumir Abdixhiku, ka vazhduar fushatën elektorale në Deçan, ku para mbështetësve dhe qytetarëve ka prezantuar pjesë të programit të tij qeverisës.
Gjatë tubimit, Abdixhiku ka vënë theksin te çështjet ekonomike dhe kostoja e jetesës, duke premtuar masa që, sipas tij, do të lehtësojnë barrën financiare të familjeve kosovare.
Një nga zotimet kryesore të tij ishte mosrritja e çmimit të energjisë elektrike. Ai deklaroi se një qeveri e udhëhequr nga LDK-ja do të aplikojë një moratorium trevjeçar, duke garantuar se tarifat e energjisë nuk do të pësojnë rritje gjatë kësaj periudhe.
Sipas Abdixhikut, mbrojtja e buxhetit familjar dhe krijimi i stabilitetit ekonomik për qytetarët do të jenë ndër prioritetet kryesore të qeverisjes së tij.
‘’Per familjet që sot e ndiejnë më së shumti barrën e çmimeve, dua ta them qartë edhe këtë: çmimi i energjisë elektrike nuk do të rritet në mandatin tonë. Moratorium i plotë për tre vite’’, tha Abdixhiku.
