Kryetari i Lidhjes Demokratike të Kosovës (LDK), Lumir Abdixhiku, ka pritur sot në takim ambasadoren e Kroacisë në Kosovë, Daniela Barišić, me të cilën ka diskutuar për zhvillimet e fundit politike në vend dhe për marrëdhëniet ndërmjet dy vendeve.
Sipas njoftimit të LDK-së, në qendër të diskutimit ishte ngërçi institucional që po e mban vendin pa institucione funksionale, për të cilin LDK e ka fajësuar mungesën e vullnetit politik nga partia fituese e zgjedhjeve, Lëvizja Vetëvendosje.
“Kryetari Abdixhiku ritheksoi nevojën urgjente për formimin e institucioneve funksionale,” thuhet në njoftim.
Gjatë takimit, palët diskutuan edhe për rëndësinë e përfaqësimit të komunitetit kroat në Kosovë, si dhe për nevojën e ofrimit të shërbimeve të drejta dhe të barabarta për të gjithë qytetarët, përfshirë edhe ata në nivel lokal, ku LDK udhëheq me komunën përkatëse.
Abdixhiku theksoi përkushtimin e partisë së tij për mbrojtjen e të drejtave të komuniteteve shumicë dhe pakicë, duke e cilësuar këtë si një gurthemel të stabilitetit dhe bashkëjetesës në vend.
Po ashtu, ai shprehu mirënjohjen për përkrahjen e vazhdueshme që Kroacia i ka dhënë Kosovës, sidomos në arenën ndërkombëtare dhe në proceset integruese.
