Kandidati i Lidhjes Demokratike të Kosovës (LDK) për kryeministër, Lumir Abdixhiku, ka prezantuar programin e tij arsimor gjatë një tubimi në Prishtinë, duke premtuar investime prej 1 miliard eurosh në sektorin e arsimit.
Abdixhiku ka deklaruar se, nëse LDK-ja vjen në pushtet, paga e mësimdhënësve do të rritet në 1 mijë euro, duke filluar nga janari i vitit të ardhshëm.
Ai po ashtu ka theksuar se mësimi tërëditor do të shtrihet në të gjithë territorin e Kosovës, me qëllim përmirësimin e cilësisë së arsimit dhe mbështetjen e familjeve.
Programi arsimor i Abdixhikut përfshin ndërtimin e 80 çerdheve të reja dhe digjitalizimin e plotë të sistemit arsimor, duke përfshirë edhe futjen e kodimit si pjesë e kurrikulës shkollore.
“Një miliard euro do të jenë investime direkte në arsim”, ka thënë Abdixhiku para mbështetësve të tij.
