Kryetari i Lidhjes Demokratike të Kosovës, Lumir Abdixhiku, ka përkujtuar rreshterin e Policisë së Kosovës, Afrim Bunjaku, në trevjetorin e rënies së tij në krye të detyrës në Banjskë.
Në një mesazh përkujtimor, Abdixhiku ka vlerësuar sakrificën e Bunjakut, i cili u vra më 24 shtator 2023, gjatë përballjes me grupin e armatosur që sulmoi Policinë e Kosovës në veri të vendit.
“Afrimi nuk u tërhoq. Nuk u dorëzua. Ai qëndroi aty ku e kërkonte detyra dhe aty ku mbrohej Republika”, ka shkruar Abdixhiku.
Kreu i LDK-së ka thënë se Bunjaku dha jetën në mbrojtje të shtetit, qytetarëve dhe sovranitetit të Kosovës, duke e cilësuar atë si simbol të institucioneve të vendit.
“Sot, emri i Afrim Bunjakut është më shumë se një emër i skalitur në historinë e Policisë së Kosovës. Ai është simbol i shtetit që mbron qytetarët e vet, i institucioneve që nuk përkulen para dhunës dhe i një Kosove që nuk frikësohet nga askush”, thuhet në mesazhin e tij.
Abdixhiku ka theksuar se përgjegjësia për sulmin në Banjskë, sipas tij, nuk duhet të kufizohet vetëm te personat që morën pjesë drejtpërdrejt në sulm.
“Përgjegjësia për këtë akt kriminal i takon jo vetëm autorëve të drejtpërdrejtë, por edhe atyre që e ideuan dhe e nxitën, e të cilët duhet të mbahen përgjegjës para drejtësisë”, ka deklaruar Abdixhiku.
Në fund të mesazhit të tij, ai ka shprehur nderimin për rreshterin Bunjaku.
“Nderim i përjetshëm për jetën dhe veprën e tij!”, ka shkruar Abdixhiku.
