Kryetari i Lidhjes Demokratike të Kosovës, Lumir Abdixhiku ka deklaruar se takimi me kryetarin e Nisma Socialdemokrate, Fatmir Limaj ishte miqësor.
Pas dështimit të tentimit të 34-të për konstituim të Kuvendit, Abdixhiku u pyet nëse do të ketë takim edhe me kryetarin e Partisë Demokratike të Kosovës, Memli Krasniqi.
“Takim shumë miqësor me zotëri Limajn, asgjë më shumë se kaq”, ka thënë ai.
Abdixhiku dhe Limaj janë takuar të mërkurën në Prishtinë. Takimi është raportuar rreth një orë e gjysmë.
Më shumë detaje lidhur me këtë takim ka dhënë Fatmir Limaj.
“Po jemi takuar (me Abdixhikun), kemi pas një takim shumë të mirë, kemi biseduar të gjitha temat, mund të them se ka qenë një takim jashtëzakonisht i mirë. Të gjitha temat që e preokupojnë Kosovën, zhvillimet në Kosovë, prej zhvillimet politike, ekonomike rajonale, angazhimet tona, obligimet që duhet kryhen… Kemi biseduar (për qeverinë e unitetit) besoj që edhe në ditët në vijim do të takohemi”, ka thënë Limaj derisa ka shtuar se është i gatshëm edhe për takime të tjera.
Ndryshe, deputetët kanë dështuar për të 34-ën herë të konstituojnë Kuvendin e Kosovës.
