Kryetari i Lidhjes Demokratike të Kosovës, Lumir Abdixhiku, ka përkujtuar 25-vjetorin e sulmeve terroriste të 11 Shtatorit 2001 në Shtetet e Bashkuara të Amerikës, duke shprehur solidaritet me familjet e viktimave dhe popullin amerikan.
Përmes një mesazhi, Abdixhiku ka kujtuar afro 3 mijë personat që humbën jetën në sulmet terroriste, duke i cilësuar ato si një ngjarje që tronditi mbarë botën dhe la gjurmë të thella në kujtesën kolektive.
“Ky sulm nuk ishte vetëm një goditje ndaj Shteteve të Bashkuara të Amerikës, por një sfidë brutale ndaj vetë vlerave themelore mbi të cilat ngrihet shoqëria demokratike, lirisë, paqes dhe bashkëjetesës”, ka deklaruar Abdixhiku.
Kreu i LDK-së ka theksuar edhe lidhjen e veçantë të Kosovës me SHBA-në, duke thënë se populli kosovar e njeh nga afër rëndësinë e lirisë dhe të aleancave ndërkombëtare.
“Lidhja e Kosovës me Shtetet e Bashkuara të Amerikës nuk është vetëm marrëdhënie mes dy vendeve; është një lidhje e ndërtuar mbi besim, vlera dhe një histori të përbashkët solidariteti”, ka shkruar Abdixhiku.
Në 25-vjetorin e sulmeve, ai ka riafirmuar përkushtimin ndaj miqësisë dhe aleancës së Kosovës me Shtetet e Bashkuara, si dhe ndaj vlerave demokratike.
“I përjetshëm qoftë kujtimi për viktimat e 11 Shtatorit”, ka përfunduar mesazhin e tij Abdixhiku.
