Kryetari i LDK-së, Lumir Abdixhiku ka pritur sot përfaqësuesin e BE-së për dialogun Kosovë – Serbi, Miroslav Lajçak, me të cilin ka diskutuar për propozimin evropian.
Abdixhiku ka thënë se LDK-ja i jep përkrahje procesit të dialogut.
“Sot, pritëm ndërmjetësuesin e BE-së në dialogun Kosovë – Serbi, z. Miroslav Lajçak. Me të biseduam për ecurinë e procesit dialogues, me theks të veçantë për propozimin evropian në lidhje me normalizimin e raporteve Kosovë – Serbi. LDK-ja i jep përkrahje procesit të dialogut, me ndërmjetësimin e BE-së dhe me përfshirjen e drejtpërdrejtë të ShBA-ve. LDK-ja rithekson se mbështet implementimin e të gjitha marrëveshjeve që janë arritur në këtë proces”, ka shkruar Abdixhiku në një postim në Facebook.
Po ashtu, ai thotë se Kosovës i duhet një marrëveshje e përqendruar te njohja e ndërsjellë dhe asnjë marrëveshje tjetër nuk garanton normalizim të marrëdhënieve.
Sipas tij, heqja dorë nga njohja është përgjegjësi e Kurtit.
“LDK-ja përsërit se Kosovës i duhet një marrëveshje e përqendruar te njohja e ndërsjellë dhe se asnjë marrëveshje tjetër nuk garanton normalizim të marrëdhënieve Kosovë – Serbi. Heqja dorë nga njohja është përgjegjësi e drejtpërdrejtë e kryeministrit Kurti dhe e institucioneve të tjera kushtetuese të Kosovës”, ka theksuar Abdixhiku.
Në këtë takim, Abdixhiku ka bërë të ditur se Lakçakut i ka kërkuar “sqarime në lidhje me tekstin e marrëveshjes së propozuar, në mënyrë të veçantë në lidhje me preambulën, me nenin 7, nenin 10 dhe me planin implementues të marrëveshjes së tanishme”. /Teve1.info/
