Abdixhiku u shpreh se në vend se Qeveria Kurti të japë zgjidhje ajo po prodhon krizë, në vend të dialogut dhe efikasitetit po shohim kërcënime dhe mungesë të plotë të realizimit të projekteve.
“Një kryeministër i tillë ka dezertuar nga detyra e tij udhëheqëse. Ai s’do të flasë me njerëzit e vendit. Mësimdhënësi tanë, administrata publike, mjekët tanë, janë vetë shteti. Nuk është shtet një njeri që ulet në tavolinën e kryeministrit e më pas mendon që secili tjetër që ka përballë e ka kundërshtar”, deklaroi Abdixhiku.
Ai kritikoi qeverinë se është krejtësisht e paaftë, dhe nuk po mundet që të përballet dhe t’iu përgjigjet problemeve të qytetarëve, ndërkohë që vendi është duke stagnuar në çdo fushë, ekonomi, arsim, shëndetësi, energji apo investime.
“Aq janë të paaftë saqë nuk e dinë që edhe e ofendojnë qytetarët tanë. Këto propozime janë ofenduese që përballueshmërinë e kanë brengë të përditshme. Për një njeri që çohet ën mëngjes, për një mësues që nuk shkon në shkollë se është në grevë është i ofenduar gjithandej që fëmijët i mban në shtëpi, që çmimi i jetesës ju ka trefishuar për një vit e gjysmë, kur e dëgjon një propozim të tillë për krizën energjike është ofendim. Mos pritni diçka më mirë. Kështu do të jetë, edhe më keq”, vijoi kreu i LDK-së.
Lidhja Demokratike e Kosovës sot nga Podujeva ka nisur një fushatë në terren dhe u paralajmëruan një sërë ngjarjesh e takimesh për të biseduar me strukturat e partisë dhe qytetarët. Kryetari Lumir Abdixhiku deklaroi se LDK-ja duhet të jetë shumë më afër qytetarëve, të dëgjojë problemet e nevojat e tyre, dhe të krijojë zgjidhje që do të zbatohen në programin e ri partiak të LDK-së, shkruan KP.
Ai ka theksuar se LDK-ja ka ofruar zgjidhje për shumicën e problemeve dhe i ka propozuar qeverisë veprime konkrete për përballimin e krizës, rritjen e shpenzimeve publike, uljen e efekteve negative të inflacionit dhe përmirësimin e gjendjes në sektorin e shëndetësisë.
“Kemi ardhur të procesi i hartimit të programit politik, 29 grupe nga tema e shëndetësisë, energjetikës, arsimit, mbrojtjes, politikës së jashtme, po punojnë çdo ditë për të bërë programin e ardhshëm qeverisë s të LDK-së. Nuk jemi në fushatë, kemi ardhur të flasim sepse këtë politikë e kemi marrë prej njerëzve tanë, kemi ardhur t’ju dëgjojmë, LDK dëgjon”, u shpreh ai.
LDK-ja në muajin e ardhshëm ka paralajmëruar se do të mbajë më shumë se 30 ngjarje, takime, debate dhe vizita në mbarë vendin. Ngjarja në Podujevë ishte e karakterit interaktiv ku publiku mund të drejtonte pyetje dhe t’i propozonte projekte dhe ide lidershipit të partisë.
