Kryetari i Lidhjes Demokratike të Kosovës (LDK), Lumir Abdixhiku, ka njoftuar se punimet në dy nga projektet më të mëdha infrastrukturore në kryeqytet – Rruga A dhe Unaza e Brendshme – janë drejt përfundimit.
Përmes një postimi në Facebook, Abdixhiku tha se së bashku me kryetarin e Komunës së Prishtinës, Përparim Rama, dhe ekipin e tij, kanë vizituar nga afër këto punishte për të parë ritmin e shpejtë të realizimit të projekteve.
“Rruga A – një kërkesë e kahershme – po bëhet realitet. Me gjashtë korsi të reja, kjo rrugë lidh Veternikun me Bregun e Diellit dhe Matin për vetëm pak minuta distancë”, shkroi Abdixhiku.
Ai shtoi se kjo rrugë jo vetëm që do të lehtësojë trafikun në qytet, por do të shndërrohet në një zonë të re banimi për mijëra qytetarë, ngjashëm me ndikimin që ka pasur ndërtimi i Rrugës B.
Ndërsa për Unazën e Brendshme, Abdixhiku theksoi rëndësinë strategjike të saj:
“Ky projekt krijon një korridor të ri të lëvizjes urbane nga Kodra e Trimave, përmes Arbërisë, deri në rrethrrotullimin për Fushë Kosovë e Mitrovicë. Me këtë, Prishtina fiton dy arterie qarkullimi që e çlirojnë qendrën si asnjëherë më parë”, deklaroi ai.
Këto dy projekte pritet të ndryshojnë ndjeshëm qarkullimin dhe zhvillimin urban në Prishtinë.
Postimi i plotë:
