Kandidati i Lidhjes Demokratike të Kosovës për postin e kryeministrit, Lumir Abdixhiku, ka prezantuar zotimet e tij për zhvillimin e infrastrukturës rrugore, duke premtuar përmbylljen e disa projekteve të rëndësishme për vendin.
Gjatë një tubimi me qytetarë në Junik, ai theksoi se qeveria e udhëhequr nga LDK do t’i japë prioritet lidhjes më të mirë të rajonit të Dukagjinit.
Abdixhiku u shpreh se magjistralet që çojnë drejt Pejës, Gjakovës, Mitrovicës dhe Podujevës do të përfundojnë, duke theksuar se kjo zonë meriton infrastrukturë moderne dhe funksionale.
“Do t’i përfundojmë magjistralet për Pejë, Gjakovë, Mitrovicë e Podujevë dhe do ta lidhim Dukagjinin siç e meriton”, tha Abdixhiku.
Në fjalën e tij, ai nënvizoi gjithashtu se çdo program qeverisës është i pavlefshëm pa një shtet funksional, institucione të forta dhe respektim të Kushtetutës. Abdixhiku theksoi rëndësinë e bashkëpunimit me partnerët ndërkombëtarë, duke e konsideruar atë si bazë për stabilitet dhe përparim të qëndrueshëm të vendit.
