Kryetari i Lidhjes Demokratike të Kosovës, Lumir Abdixhiku ka thënë se kjo parti është rikthyer e para në Prishtinë, edhe pse siç ka thënë ai të gjithë ishin kundër tyre.
Ai ka thënë se në katër vite të mandatit të Përparim Ramës është bërë punë.
“Në Prishtinë, jemi rikthyer si parti e parë pas 12 vitesh jo me propagandë, as me exit-polle, e edhe me pak me zhurmaxhi mercenarë. Të gjithë kundër ditë e natë pa ndalë. Nuk jemi marrë fare me ta. Në Prishtinë, jemi rikthyer veç me punë. Punë në katër vite mandat të Përparim Ramës dhe LDK-së. Punë me ndryshimet e brendshme partiake. Sot, struktura e LDK-së në Kryeqytet, me 5 degë e 83 nëndegë është par ekselancë! Guri, siç i themi ne. Model për secilin qytet. Prandaj prijmë me parti e kandidat në Prishtinë”, ka shkruar ai në Facebook.
Kandidati i LDK-së për kryetar të Prishtinës, Përparim Rama do të përballet në raundin e dytë me atë të Vetëvendosjes, Hajrulla Çeku.
Rama në zgjedhjet e së dielës sipas rezultateve preliminare mori 33,76% të votave, kurse Çeku 33,05%.
Ndërsa, LDK është e para sa i përket votave për subjektet politike për asamble komunale me 28,98%.
