Këtë reagim Abdixhiku e ka bërë pas vendimit të Qeverisë për pezullimin e pagave në kohën kur punëtorët e arsimit marrin pjesë në grevë, shkruan teve1.info.
“Kërkimi i listave të punonjësve në grevë nga ana e Qeverisë përveçse presion i drejtpërdrejtë ndaj punëtorëve të sektorit publik është dhe kërcënim ndaj proceseve demokratike në vend dhe vet shtetit juridik”, ka shkruar ai në Facebook.
Tutje i pari i LDK-së ka theksuar se shoqëria kosovare duhet të rreshtohet prapa mësuesve, mjekëve e shërbyesve publik që sipas tij ata me plot të drejtë, në krizën më të madhe ekonomike, kërkojnë dialog, dinjitet e përballueshmëri.
“Ndërprerja e kontratave të tyre, në këtë kohë krize, është goditja më e rëndë që një Qeveri mund t’u japë qytetarëve të vet. Kështu nuk duhet të duket Kosova demokratike, kështu nuk duhet të trajtohen punëtorët tanë. Kryeministri i premtimeve, që sot s’mund ta mbajë asnjë, po dëshmon, si çdo ditë, që është i paaftë për të menaxhuar me vendin, kërkesat qytetare e krizat e mëdha”, ka thënë Abdixhiku.
