Kryetari i LDK-së, Lumir Abdixhiku ka thënë se rezultati i zgjedhjeve për këtë parti ishte zhgënjyes.
Ai ka thënë se viti 2025 është vit reflektimi dhe marrje përgjegjësie.
Abdixhiku në një postim në Facebook ka thënë se vendimet do t’i shpalosë në një kohë dhe vend të duhur.
“Ky është edhe një vit reflektimi personal. Kam bërë gjithçka që kam ditur dhe mundur, me ndershmëri dhe me përkushtim. Ndonjëherë, edhe kur jep maksimumin, nuk mjafton; dhe këtë e pranoj me dinjitet. Përpara nesh është një kohë reflektimi, vendimmarrjeje dhe përgjegjësie. Me kohë e në vendin e duhur, siç na mëson dinjiteti e përgjegjësia politike, do t’i shpalosi të gjitha. Çfarëdo që sjell e nesërmja, unë do të jem gjithmonë në shërbim të vendit tim. Në këtë natë të fundvitit, dua ta gjej kohën e humbur tek familja ime, tek dy vajzat e mia, të cilave u kam borxh më shumë kohë, më shumë prani time, më shumë dëgjim. Ju uroj të gjithëve një Vit të Ri të mbarë; juve dhe familjeve tuaja. Le të kemi një vit më të butë, më njerëzor, më të drejtë për Kosovën tonë. Shëndet, paqe në shtëpitë tuaja dhe besim se e mira, sado vonë të vijë,vjen gjithmonë”, ka shkruar Abdixhiku në Facebook.
Abdixhiku pas rezultateve të zgjedhjeve të 28 dhjetorit kishte paralajmëruar mbledhjen e Kuvendit të Partisë dhe kishte marrë përgjegjësinë për rezultatin e kësaj partie,e cila u doli e treta, por me rezultat me të dobët se në zgjedhjet e shkurtit.
