I pari i LDK-së, Lumir Abdixhiku, e ka quajtur mashtrim dhe humbje të një mundësie historike, marrëveshjen e cila është dakorduar dje në Ohër mes kryeministrit të Kosovës, Albin Kurti dhe presidentit të Serbisë, Alekandar Vuçiq.
Sipas tij, marrëveshja e arritur mbrëmë ishte kauzë politike e rremë që Kosovës i kushtoi shumë, raporton teve1.info.
“Një kauzë politike e rremë – që Kosovës i kushtoi tmerrësisht shumë – përfundoi sonte. Kushtet e vëna, fjalimet e thëna, qëndrimet e dhëna, thjeshtë u zhbënë”, ka reaguar Abdixhiku në Facebook.
Abdixhiku tutje ka thënë se është arritur një marrëveshje pa njohje, jo finale dhe me Asociacion.
“Përveç saj, një marrëveshje pa njohje, jo finale dhe me asociacion plus në të është çfarë Kurti i solli Kosovës sot. Kjo gjendje e re, e shndërruar si detyrim integrues për vendin tonë, është e pariparueshme më”, ka shkruar ai.
Gjatë takimit në Ohër, dje kryeministri Kurti dhe presidenti Vuçiq janë pajtuar që ta implementojnë aktin e zbatimit të marrëveshjes së dakorduar më 27 shkurt në Bruksel. Ndërkaq, Kurti, bëri të ditur se u arrit pajtim publik për një aneks që udhëzon zbatimin e Marrëveshjes, derisa akuzoi Serbinë se i iku sërish nënshkrimit.
