Kryetari i Lidhjes Demokratike të Kosovës, Lumir Abdixhiku, ka konfirmuar se deputetët e LDK-së nesër do të marrin pjesë vetëm në seancën e orës 14:00, ku pritet votimi për formimin e Qeverisë së re.
Ai ka bërë të qartë se vota e LDK-së për një qeveri të drejtuar nga Glauk Konjufca do të jetë kundër.
“Nesër, nga ora 14:00, votojmë me bindje e krenari kundër pakicës që nuk mund të sillet si shumicë më në këtë shtet”, ka shkruar Abdixhiku në një reagim publik.
Sipas tij, me seancën e nesërme, LDK do të nisë përgatitjet për zgjedhjet e reja nacionale, duke paralajmëruar mobilizim të gjerë politik.
“Nesër nisim përgatitjet për zgjedhjet e reja nacionale dhe ftesën e madhe për përbashkim të secilit që është ngopur me një politikë si kjo, që mendon të shpëtojë shtetin e Republikën nga ata që e shohin atë vetëm si instrument e si lojë karrigesh”, ka theksuar ai.
Në anën tjetër, Abdixhiku ka konfirmuar se LDK nuk do të marrë pjesë në seancën e orës 11:00, ku në rend dite janë marrëveshjet ndërkombëtare dhe çështjet buxhetore.
“Mblidhuni vet; i bëni muhabet vetes. Luftën me mullinjtë e erës e bëni mirë”, ka shkruar ai, duke kritikuar mënyrën se si është thirrur seanca nga mazhoranca aktuale.
