Kryetari i Lidhjes Demokratike të Kosovës, Lumir Abdixhiku, ka kujtuar sot 35-vjetorin e shpalljes së Kushtetutës së Kaçanikut, të cilën e ka cilësuar si një nga ngjarjet më të shënuara të historisë së re kombëtare.
Në një mesazh me këtë rast, Abdixhiku tha se më 7 shtator 1990 deputetët e Kosovës, me guxim dhe vendosmëri, shpallën Kushtetutën e Republikës së Kosovës – aktin themelor të shtetësisë që njihet përjetësisht si Kushtetuta e Kaçanikut.
Sipas tij, ky akt nuk ishte vetëm juridik, por një akt i madh rezistence dhe sfidë e hapur ndaj pushtimit serb.
“Ishte shprehja më e qartë e vullnetit të palëkundur të popullit tonë për liri, për barazi dhe për një të ardhme të pavarur e demokratike”, u shpreh Abdixhiku.
Ai rikujtoi edhe fjalët e presidentit historik, Ibrahim Rugova, i cili e kishte cilësuar 7 shtatorin e vitit 1990 si ditën e vënies së themeleve të shtetit të Kosovës, që pasoi Deklaratën e Pavarësisë të 2 Korrikut të po atij viti.
Në këtë përvjetor, kreu i LDK-së u përul me nderim para deputetëve të atëhershëm të Kuvendit të Kosovës dhe gjithë atyre që punuan për ta bërë realitet ëndrrën shekullore të shqiptarëve për liri e pavarësi.
“Kushtetuta e Kaçanikut mbetet testament i gjallë i rrugëtimit tonë, frymëzim i përhershëm për të mbrojtur shtetin e Kosovës dhe për ta zhvilluar e forcuar demokracinë”, përfundoi Abdixhiku.
