Kryetari i Lidhjes Demokratike të Kosovës, Lumir Abdixhiku, ka përkujtuar 26 vjetorin e Masakrës së Mejës.
Ai ka thënë se kjo është një nga plagët më të rënda që ka përjetuar Kosova në historinë e saj.
Abdixhiku ka thënë se ky ishte një akt barbar nga forcat policore e ushtarake serbe.
“Më 27 prill 1999, Kosova përjetoi një nga plagët më të rënda në historinë e saj, Masakrën e Mejës. Në atë ditë të rëndë, 376 civil shqiptarë, u morën mizorisht nga jeta nga forcat policore e ushtarake serbe, në një akt barbar që ka lënë dhimbje të pashuar në shoqërinë tonë.Aparati shtetëror serb organizoi izolimin e mbi 15 fshatrave, duke grumbulluar dhe ekzekutuar djemtë e burrat tanë para syve të familjarëve të tyre, në një pamje që as koha nuk do të mund ta fshijë nga kujtesa jonë. Dhimbja e të gjitha atyre familjeve është dhe dhimbje e jona; por mbi të gjitha është rikujtim i vuajtjeve të popullit të Kosovës për lirinë e sotme. Sot, gjithandej Kosovës japim nderimet e tona për civilët e vrarë e dëshmorët e rënë. Çmimi i lirisë së Kosovës ka qenë çmim i vet jetës – sikurse i 376 civilëve të Mejës”, ka thënë Abdixhiku.
Ai duke kujtuar Ditën Kombëtare të Personave të Zhdukur ka thënë bërë thirrje për drejtësi dhe zbardhjen e fatit të të pagjeturve.
“Sot, kemi dhe një detyrim shtesë. Në Ditën Kombëtare të Personave të Zhdukur në Kosovë, vazhdojmë të thërrasim për drejtësi dhe zbardhjen e fatit të 1617 qytetarëve tanë të pagjetur. Kosova s’mund të ecë përpara pa gjetjen e qetësisë për familjarët e të pagjeturve. Lavdi përjetësisht dëshmorëve të Masakrës së Mejës dhe të gjithë të rënëve gjithandej Kosovës!”, ka shkruar kreu i LDK-së.
