Kryetari i Lidhjes Demokratike të Kosovës, Lumir Abdixhiku, ka shprehur ngushëllime për familjen Beqiri pas identifikimit të eshtrave të veprimtarit të LDK-së, Adem Beqiri, 27 vjet pas zhdukjes së tij.
Në mesazhin drejtuar familjes, Abdixhiku ka theksuar dhimbjen dhe pritjen e gjatë të familjarëve, duke thënë se me identifikimin e eshtrave “kjo pritje e gjatë merr fund”.
“Dhimbja mbetet e thellë, por familja Beqiri dhe të gjithë ne më në fund kemi një vend ku mund të përulemi, një varr ku mund të vendosim lule dhe një emër që nuk do të mbetet më pezull në pasigurinë e luftës”, ka shkruar Abdixhiku.
Sipas tij, Adem Beqiri ishte veprimtar i LDK-së dhe anëtar i Kryesisë së Degës së LDK-së në Mitrovicë. Abdixhiku ka vlerësuar angazhimin e tij politik dhe kontributin në ndihmën ndaj personave të rrezikuar gjatë viteve të luftës.
“Adem Beqiri nuk mbetet vetëm një emër në kujtesën e luftës. Ai mbetet dëshmi e një brezi që e përjetoi rrezikun si detyrë dhe përkushtimin ndaj vendit si përgjegjësi”, ka deklaruar ai.
Në fund të mesazhit, Abdixhiku u ka shprehur ngushëllime familjarëve, të afërmve dhe bashkëveprimtarëve të Adem Beqirit, duke theksuar se kujtimi për të do të mbetet pjesë e kujtesës së përbashkët.
“Lavdi e përjetshme veprimtarit Adem Beqiri! Kujtimi për të qoftë i përjetshëm!”, ka përfunduar Abdixhiku./teve1.info/
