Kandidati për kryeministër i Lidhjes Demokratike të Kosovës, Lumir Abdixhiku, nuk i komentuar akuzat që kryeministri Albin Kurti dhe i mandatuari edhe për një mandate nga Lëvizja Vetëvendosje, i ka bërë në drejtim të kësaj partie.
Abdixhiku ka thënë se e fton Kurtin siç e ka quajtur kryeministër në ikje për ballafaqim me idetë për të ardhmen.
“Nuk merremi me çështje negative në këtë fushatë, kemi përpara një obligim të madh qytetar dhe ky obligim na thërret për propozime konkrete, për ide të ardhshme se si bëhet vendi. Nuk jemi për t’u sharë e për t’u zhytur në moçalin e madh të pështymave, jemi për të prezantuar punën e ardhshme të Republikës së Kosovës, sepse na duhet t’ju shpjegojmë qytetarëve tanë se për çfarë qëndrojmë. Kryeministrin në ikje e ftoj edhe për ballafaqim publik e t’i masim idetë për idetë për të ardhmen. Për t’u sharë i kemi disa tjerë, por nuk e kam ndërmend këtë fushatë me u shajtë”, ka thënë Abdixhiku, të martën në një deklarim për media.
Ndryshe, Kurti e ka krahasuar me “mizën” Lidhjen Demokratike të Kosovës (LDK), gjatë një fjalimi të hënën në Pejë.
“Kur na rastit të dëgjojmë ndonjë udhëheqës të LDK që thotë se po i pëlqen populli e ka simpati për ta, kjo mu m’i përngjan asaj mizës që thoshte kudo po shkoj po më presin me duartrokitje. Pra kur ata thonë që populli është si ajo miza që lavdohet se njerëzit po e presin me duartrokitje. E ju e dini shumë mirë që me ato duar që duartrokasin çka janë duke provuar t’i bëjnë asaj mize”, u shpreh Kurti.
