Kryetari i Lidhjes Demokratike të Kosovës, Lumir Abdixhiku ka reaguar pas dështimit të 51-të për konstituimin e Kuvendit, duke kritikuar paqartësitë që kanë lindur pas përfundimit të afatit 30-ditor të dhënë nga Gjykata Kushtetuese.
“Vendit i duhet qartësim se çfarë ndodh pas periudhës 30-ditore dhe kalimit të afatit të dhënë nga Gjykata Kushtetuese. Kemi një paqartësi me aktgjykimin e parë deri tani, dhe nuk kemi dyshim se tashmë ka edhe shkelje kushtetuese në lëndën tonë të dërguar në Gjykatën Kushtetuese,” tha Abdixhiku.
Ai theksoi se më i moshuari i Kuvendit, Avni Dehari ka refuzuar të respektojë aktgjykimin paraprak të Kushtetueses, gjë që përbën shkelje.
“LDK beson se partisë së parë i ka takuar e drejta të propozojë emrin dhe të bëjë shumicën. Gjykata Kushtetuese nuk duhet të devijojë nga kapitulli i përgjegjësive sa i përket presidentes së vendit,” shtoi ai.
Abdixhiku nënvizoi gjithashtu se në 99% të rasteve që dërgohen në Gjykatë Kushtetuese, kërkohet edhe masa e përkohshme, dhe për shkak të rrjedhjes së afatit, LDK e sheh të domosdoshme një ndërhyrje të menjëhershme për të shmangur krizën institucionale.
“Konsiderojmë që kemi paqartësi dhe nuk e shohim si të dëmshme apo të pavend adresimin e kësaj çështjeje,” përfundoi ai./teve1.info/
