Kryetari i Lidhjes Demokratike të Kosovës, Lumir Abdixhiku ka thënë se Kosova dhe Shqipëria kanë marrëdhënie të veçantë e ndërtuar mbi histori e vlera.
Kështu ai është shprehur pas takimit që ka zhvilluar me ministren e Jashtme të Shqipërisë, Elisa Spiropali.
“Kosova dhe Shqipëria ndajnë një marrëdhënie të veçantë, të ndërtuar mbi histori, vlera dhe aspirata të përbashkëta. Por mbi të gjitha, ndajnë përgjegjësinë që bashkë, në mënyrë serioze dhe të koordinuar, të kontribuojnë në paqen e qëndrueshme dhe perspektivën evropiane të rajonit tonë. Ritheksuam rëndësinë e bashkëpunimit të ngushtë institucional, të dialogut të rregullt politik dhe të përkrahjes reciproke në rrugën e integrimit evropian dhe euroatlantik. Ky bashkëpunim mbetet një shtyllë strategjike për të ardhmen e qytetarëve tanë dhe për forcimin e rolit tonë në arenën ndërkombëtare”, ka shkruar Abdixhiku në Facebook.
Ai poashtu njoftoi se në takim u diskutua edhe për zhvillimet politike në rajon, sfidat aktuale të sigurisë, si dhe për rëndësinë e koordinimit të vazhdueshëm ndërmjet Kosovës dhe Shqipërisë në proceset integruese euroatlantike.
