Kryetari i Lidhjes Demokratike të Kosovës, Lumir Abdixhiku ka pritur sot në takim ambasadorin e Gjermanisë në Kosovë, Jorn Rohde.
Në një komunikatë për media thuhet se gjatë takimit u diskutua për zhvillimet e fundit politike në vend si dhe për qëndrimet e Lidhjes Demokratike të Kosovës lidhur me këto çështje.
“Kryetari Abdixhiku shprehu mirënjohjen e tij dhe të LDK-së për mbështetjen e vazhdueshme që Gjermania i ka dhënë dhe vazhdon t’i jap Kosovës në rrugëtimin e saj euroatlantik, në forcimin e institucioneve demokratike dhe në zhvillimin ekonomik. Ndërsa me theks të veçantë, kryetari Abdixhiku foli për nevojën urgjente për heqjen e masave ndëshkuese të vendosura nga Bashkimi Evropian ndaj Kosovës, duke theksuar se këto masa po ndikojnë drejtpërdrejt në zhvillimin ekonomik të vendit dhe në mirëqenien e qytetarëve tanë. Po ashtu ai bëri thirrje për rishqyrtim të këtij vendimi, në mënyrë që qytetarët e Kosovës të mos mbajnë barrën e zhvillimeve politike”.
Tutje, thuhet se përmes ambasadorit Rohde, kryetari Abdixhiku uroi koalicionin e ri qeverisës në Gjermani, duke besuar në vazhdimin e bashkëpunimit të ngushtë dhe të frytshëm ndërmjet vendeve tona, por në veçanti shprehu besimin në bashkëpunimin e shkëlqyeshëm mes CDU-së dhe LDK-së, si dhe angazhimin e përbashkët për forcimin dhe avancimin e këtij bashkëpunimi politik e institucional mes partive tona.
