I pari i LDK-së e ka kujtuar Agim Ramadanin si figurë shumëdimensionale, unike e të papërsëritshme, shkruan teve1.info.
“Në këtë përvjetor ne nderojmë figurën shumëdimensionale, unike e të papërsëritshme të Agim Ramadanit, kontributin dhe gjurmët e tij të pashlyeshme në rrugëtimin për liri e shtet-ndërtim. Figurat si Agim Ramadani, të paepur për liri e çlirim ranë për të mos vdekur kurrë”, është shprehur Abdixhiku.
Ai më tej ka thënë se Agim Ramadani është i përjetësuar në historinë tonë për luftën e tij dhe guximin prej strategu ushtarak në Betejën më të lavdishme të Ushtrisë Çlirimtare të Kosovës, atë të Koshares.
“Sot, përkujtojmë, Heroin Agim Ramadani; Agimin e lirisë që është i përjetësuar në historinë tonë për luftën e tij dhe guximin prej strategu ushtarak në Betejën më të lavdishme të Ushtrisë Çlirimtare të Kosovës, atë të Koshares. Kujtojmë piktorin dhe shkrimtarin që edhe përmes vargjeve i dha jetë luftës e lirisë. Në kohët më të vështira, kur lëshoj zë kushtrimi i atdheut, Agimi, si gjithmonë ishte në krye të detyrës, ndërsa vetë ai nuk ndihej i përmbushur pa sakrificën më sublime edhe me vet jetën e tij për çlirim të vendit”, ka thënë Abdixhiku.
