Kryetari i Lidhjes Demokratike të Kosovës, Lumir Abdixhiku, së bashku me kryetarin e Komunës së Prishtinës, Përparim Rama kanë bërë sot homazhe në nderim të jetës dhe veprës së ikonës së filmit dhe teatrit, Enver Petrovci.
Në një postim në Facebook nga LDK-ja thuhet se Enver Petrovci mbetet një nga figurat më të shquara të artit, teatrit dhe kulturës në Kosovë.
“Enver Petrovci mbetet një nga figurat më të shquara të artit, teatrit dhe kulturës në Kosovë. Ai ishte ndër të parët artistë, ligjërues dhe personalitete që lanë gjurmë të pashlyeshme në kohën dhe shoqërinë tonë. Vepra e tij do të kujtohet përherë si shembull i profesionalizmit të jashtëzakonshëm dhe i përkushtimit ndaj kulturës kombëtare”, thuhet në postimin e LDK-së.
Abdixhiku dhe Rama shprehën ngushëllime familjes së Petrovcit, miqve dhe gjithë komunitetit artistik.
“Me këtë rast, kryetari Abdixhiku si dhe kryetari i Prishtinës, Përparim Rama ju shprehën ngushëllime të sinqerta familjes Petrovci, miqve, si dhe gjithë komunitetit artistik, duke theksuar se Kosova humbi një ikonë, por trashëgimia e tij do të mbetet e gjallë përherë”, thuhet në njoftim./teve1.info/
