Përmes një postimi në Facebook, Abdixhiku u shpreh se si përfaqësues i qytetarëve e ndjen pjesën e hidhërimit por edhe përgjegjësisë që u takon për mosndëshkimin e këtyre akteve.
“Jam thellësisht i prekur nga ngjarja në Prishtinë, ku një vajze të vogël iu këput ecja nga një akt monstruoz dhunimi. Si baba i vajzave, por, edhe si përfaqësues i qytetarëve ndjej pjesën e hidhërimit dhe njëkohësisht përgjegjësisë që na takon secilit për mos ndëshkimin e këtyre akteve në formën e duhur, por edhe për mos arritjen e shkallës së emancipimit që ta trajtojmë vajzën e gruan si të barabartë në këtë shoqëri”, shkroi ndër tjerash ai.
Tutje, ai kërkoi dënim maksimal për të gjithë të dyshuarit, duke shtuar se nevojitet angazhim i të gjitha institucioneve për ta çrrënjosuar dhunën.
“Bashkëndjej me prindërit e vajzës së mitur dhe të gjitha bashkëmoshataret e saj që edhe një herë u bënë dëshmitare të një akti të tillë abuzues e çnjerëzor. Kemi për detyrim që nga fjalët dënuese të kapërcejmë në akte konkrete që luftojnë këtë anë të errët të shoqërisë dhe shtetit tonë. Dhunuesve, dënim maksimal – asgjë më pak – për këtë akt monstruoz. Na duhet angazhim maksimal i të gjitha institucioneve, si dhe çdo njërit nga ne, për të çuar përpara përpjekjet tona për ta çrrënjosur dhunën në bazë gjinore. Eliminimi i dhunës është detyrim i secilit veç e veç dhe i të gjithëve së bashku”, shtoi ai./teve1.info/
