Kryetari i Lidhjes Demokratike të Kosovës (LDK), Lumir Abdixhiku, priti sot në Selinë Qendrore të partisë Përfaqësuesin e Posaçëm të Norvegjisë për Ballkanin Perëndimor, z. Eirik Nestås Mathisen.
Gjatë takimit u diskutua për zhvillimet politike në vend, sfidat aktuale me të cilat po përballet Kosova, si dhe për domosdoshmërinë e formimit të institucioneve funksionale dhe legjitime që garantojnë stabilitet politik dhe institucional.
Kryetari Abdixhiku prezantoi qëndrimet e LDK-së lidhur me krizën aktuale politike, duke theksuar se propozimi i partisë për një Qeveri të Unitetit mbetet zgjidhja më e qëndrueshme dhe gjithëpërfshirëse për tejkalimin e bllokadës institucionale dhe për ecjen përpara drejt konsolidimit demokratik të vendit.
Temë e diskutimit ishin edhe sanksionet e vendosura nga Bashkimi Evropian ndaj Kosovës. Kryetari Abdixhiku shprehu shqetësimin e tij lidhur me efektet negative që këto masa po kanë në procesin e integrimit evropian të vendit. Ai theksoi se tashmë është koha për një rishikim dhe heqje të sanksioneve, si hap i domosdoshëm për të ruajtur dhe përforcuar orientimin euroatlantik të Republikës së Kosovës.
