Dënimi i terroristëve dhe mbajtja përgjegjëse e Serbisë janë detyrime tona si shtet e si shoqëri.
Kryetari i Lidhjes Demokratike të Kosovës, Lumir Abdixhiku në një vjetorin e rënies së rreshterit Afrim Bunjaku, ka thënë se Bunjaku sakrifikoi jetën për shtetin e Kosovës.
Abdixhiku ka thënë se shembulli i tij është model e motiv se si mbrohet atdheu.
“Sot, më 24 shtator është bërë viti që nga rënia në krye të detyrës, në mbrojtje të sovranitetit dhe integritetit të Kosovës, e policit-hero, Afrim Bunjaku. Ai u vra nga pjesëtarë të një grupi terrorist të sponzorizuar dhe komanduar nga Serbia, gjersa po ushtronte profesionin dhe punën fisnike prej polici në mbrojtjen e rendit dhe mirëqenies për të gjithë qytetarët e Republikës së Kosovës. Afrim Bunjaku është Heroi i cili sakrifikoi jetën e tij për shtetin e Kosovës. Shembulli i tij është model dhe motiv për brezat se si mbrohet e si duhet shërbyer atdheut edhe në kohë paqeje”, ka shkruar ai.
Kreu i LDK-së, ka thënë se dënimi i terroristëve dhe mbajtja përgjegjëse e Serbisë për organizimin e këtij sulmi janë detyrime si shtet e shoqëri.
“Vrasja e heroit Bunjaku ishte goditje e rëndë jo vetëm për familjen dhe kolegët policë, por edhe për shtetin e Kosovës. Prandaj dënimi i terroristëve si dhe mbajtja përgjegjës e Serbisë si organizator i agresionit ndaj Republikës janë detyrime tona si shtet e si shoqëri. Afrim Bunjaku mbetet përherë në kujtesën shtetërore si personalitet që dha frymën e fundit për territorin e Republikës së Kosovës. I përjetshëm kujtimi e nderimi për Afrim Bunjakun. Lavdi e përjetshme!”, ka shkruar Abdixhiku.
