Kryetari i Lidhjes Demokratike të Kosovës (LDK), Lumir Abdixhiku, ka deklaruar se përfshirja e Kosovës në një iniciativë ndërkombëtare për paqen, të udhëhequr nga Presidenti i Shteteve të Bashkuara të Amerikës, Donald Trump, përbën një moment që, sipas tij, tejkalon rëndësinë e çdo lajmi ditor.
Abdixhiku ka theksuar se për një shtet që ka kaluar nga lufta në liri, falë edhe ndërhyrjes ndërkombëtare, pjesëmarrja në tryezat ku diskutohet paqja globale është njëkohësisht dëshmi dhe përgjegjësi.
“Dëshmi e suksesit tonë, përgjegjësi për rolin tonë prej shtetit të ri. Është shenjë se Kosova nuk shihet vetëm si përfituese e paqes, por edhe si pjesë e saj”, ka thënë ai.
Sipas Abdixhikut, në një botë gjithnjë e më të brishtë, çdo hap i përbashkët me Shtetet e Bashkuara të Amerikës përbën një forcim të sigurisë kombëtare të Kosovës, thellim të aleancave strategjike dhe pozicionim të vendit në anën e paqes dhe aleancave të drejta.
“Lidhja Demokratike e Kosovës e mbështet këtë hap të madh drejt një kapitulli të ri dhe i gëzohet këtij fakti historik. Sepse sukseset e Kosovës janë arritje kombëtare para së cilave e me të cilat mburremi të gjithë”, ka përfunduar Abdixhiku.
Ndryshe, Presidentja e Republikës së Kosovës, Vjosa Osmani, sot në Davos të Zvicrës ka nënshkruar Kartën e Bordit të Paqes, në prani të Presidentit të Shteteve të Bashkuara të Amerikës, Donald Trump, duke përfaqësuar Republikën e Kosovës në këtë iniciativë ndërkombëtare për paqen.
Bordi i Paqes është organ i ri ndërkombëtar i iniciuar nga Trumpi, i cili synon mbikëqyrjen e zbatimit të planeve të paqes në zonat e konfliktit, me fokus fillestar në Rripin e Gazës./teve1.info/
