Marrëveshje kjo e cila përmban kryesisht obligimet e shtetit dhe institucioneve ndaj kësaj bashkësie fetare.
Vetëm pas nënshkrimit të marrëveshjes Abazoviq e njoftoi publikun duke publikuar një video në rrjetin social Facebook ku shihet bashkë me kreun e Kishës Ortodokse Serbe, Patriarkun Porfirije.
“Jam jashtëzakonisht i nderuar dhe i kënaqur që përfunduam procesin që, për fat të keq, zgjati shumë në Mal të Zi. Jemi të lumtur dhe të kënaqur nëse kemi kontribuar për këtë sot. Besoj se kjo marrëveshje dërgon një mesazh paqeje dhe tolerance. Kjo është një ide udhërrëfyese, shumë tolerante dhe besoj se sot i dhamë fund një sfide që na qëndronte përpara”
E lidhur me këtë, në emisionin ‘’Ditari’’ në tëvë1 foli ish-ambasadori i Kosovës në Mal të Zi, Ylber Hysa.
Ai tha se kryeministri malazez Dritan Abazoviq, ka qenë këmbëngulës në arritjen e kësaj marrëveshjeje.
“Sot kam kontaktuar me ministrin e Mbrojtjes dhe ministrin e Jashtëm të cilët më kanë thënë që iniciativa tashmë është ngritur dhe se janë mbledhur 36 nënshkrime, pra ju duhen edhe pesë nënshkrime në mënyrë që me shumicën e thjeshtë me 41 vota ta sjellin rrëzimin e Qeverisë. Dhe unë mendoj se kjo nuk është ndonjë çudi fare për Abazoviq. Madje në takim këtë ai e pranoi. Ai e pret që të rrëzohet kjo Qeveri dhe të shkohet në zgjedhje. Dhe tashmë ai ka zgjedhur këtë rrugë politike dhe nuk është për t’u çuditur nëse kjo ndodh shpejt”, tha Hysa.
Madje sipas tij kjo marrëveshje ka qenë e fshehtë.
“Mos harroni që kjo është bërë në mënyrë gjysmë të fshehtë dhe të heshtur, nuk ka pasë paralajmërime. Reagimet do të jenë edhe në rrugë”, shtoi Hysa.
Përmes kësaj marrëveshjeje, Kishës Ortodokse Serbe në Mal të Zi i mundësohet eksterritorialiteti i objekteve fetare, hapet mundësia e mësimit fetar në shkollat publike, i njihet subjektiviteti për gjashtë shekuj më i gjatë se sa që Kisha Ortodokse Serbe ka në Serbi, si dhe i jep asaj kompetenca publike-juridike dhe në disa fusha ia mundëson statusin ligjor të barabartë me institucionet shtetërore.
Raporti i gazetares Albiona Hajdari.
