Këshilli i Marrëdhënieve Shqiptaro-Amerikane (AARC) ka përshëndetur sinjalet nga Shtetet e Bashkuara për rifillimin e Dialogut Strategjik me Kosovën, ndonëse ky proces ende nuk ka nisur zyrtarisht.
AARC thekson se marrëdhëniet ndërmjet dy vendeve janë përballur me sfida serioze kohëve të fundit, përfshirë pezullimin e projekteve të rëndësishme si Millennium Challenge Corporation (MCC) dhe ndërprerjen e Dialogut Strategjik, si pasojë e veprimeve që Uashingtoni i ka cilësuar si “të njëanshme”.
Sipas AARC-së, rikthimi i dialogut formal do të përbënte një sinjal të qartë të vullnetit të ndërsjellë për të ecur përpara në mënyrë konstruktive dhe me koordinim më të ngushtë.
Organizata ka vlerësuar gjithashtu zgjedhjet e fundit në Kosovë, duke theksuar se ato dëshmojnë përkushtimin e vendit ndaj demokracisë, por njëkohësisht reflektojnë pakënaqësinë në rritje të qytetarëve ndaj presionit ndërkombëtar.
“Kjo ndjenjë duhet marrë seriozisht nga Shtetet e Bashkuara ndërsa shqyrtojnë angazhimin më të gjerë strategjik me Kosovën. Zgjedhjet ofrojnë si një mandat ashtu edhe një mundësi për të konsoliduar institucionet që janë të afta të përcaktojnë një rrugë të re dhe të rivendosin marrëdhëniet me Uashingtonin mbi një bazë më të qëndrueshme”.
Sipas organizatës, mbështetja e vazhdueshme amerikane në fushën e sigurisë dhe mbrojtjes, edhe gjatë periudhave të tensioneve diplomatike, dëshmon për përkushtimin strategjik të ShBA-së ndaj Kosovës.
Në këtë kontekst, AARC kërkon një reagim dhe nga ana e Prishtinës, duke sugjeruar që kryeministri në detyrë, Albin Kurti të realizojë një vizitë zyrtare në Uashington si shenjë e qartë e përkushtimit për rifillimin e marrëdhënieve strategjike.
Organizata vlerëson edhe rolin e presidentes Vjosa Osmani në ruajtjen dhe forcimin e lidhjeve me SHBA-në gjatë periudhave sfiduese, duke bërë thirrje që kjo qasje të shtrihet në të gjithë qeverinë.
